جوج وصفات حقولي كل ما كنت كانتمنا في حياتي

[عاتقة]

السلام عليكم ورحمة الله ليوم بغيت نشارك معاكوم جوج ديال الوصفات غيرو بزااااف ديال الحجات في حياتي في الوقت لي وصلت لواحد الدرجة ديال اليأس لي مرضاتني فصحتي و فنفسيتي بعد ما تخرجت من الجامعة و من شعبة متميزة كان عندي طموح كبيير ولكن الاحلام باريسية و الواقع صومالي هههه مالقيتش خدمة و جلست عامين هير تانديباني راسي و هير خواتات لي كانو تايدورو معايا  مرة مرة... حتا لواحد نهار واحد الصديقة ديالي الله يسمح ليها و يهديها بقات كاتزنزن لي فراسي يالاهي لواحد شواف شوفي مالك عندك العكس و خصوصا بعد ما فسخت خطوبتي و شحال من واحد رفضتو و جليت لا خدمة لا زواج واخة عمري كان 23 سنة.. المهم مشيت معاها و كشف ليا داك الشواف و الهضرة لي قالي ماعجباتنيش واخة قالي عند الزواج انا كنت باغة نخدددم... عاود قالت لي يالاه عند واحد اخر مشيت معاها قلت اصلا صلاتي دابة مامقبولاش هير نكمل شنو بديت مشيت قالي ماغاديش تخدمي.... مشيت عند شوافة قالت لي ماخاديش تخدمي و غادي تزوجك السيد لي يالاه جات مو عندكوم هضرات فيك و اسمو محمد تيقت هضرتها و بديت تانتسنا هاد محمد فوقاش يدخل المغرب تقريبا شي عام !!!! ولكن ما شفت لا محمد لا خدمة.... لخدمة لي تانبداها تاندوز فيها نهار و نخرج و ديمة مريضة و جاني مس شيطاني و ضرباتني واحد الزلطة و مرضات ماما و نعسات فطبيب المهم دوزت القهرة و لكن فقت من السبات لي كنت فيه و حلفت و حرمت ديني مانعاود نعتب عند شي فقيه ولا شواف و غالجت راسي بالرقية و كدبت الهدرة لي قالولي حميع الدجالة لي مشيت عنهوم و قلت مع نفسي الله قادر سبحانه و تعالى يبدل حالي و حتى شي حد ما تايعلم الغيب... درت يقيني في الله و بديت تاندعي كل نهار في كل صلاة و كل وقت و تانقول يا ربي تعلي مقامي يا رب تعلي مقامي.... و التزمت بجوج وصفات لي الحمد لله غيرولي حياتي.... 
اول وصفة الاستغفاااااااااااااار ايييه اختي هيير الاستغفار اكثر من 1000 مرة في اليوم في الصباح و اليل و الزنقة فالطوبيس طاكسي.... فاش تانخرج نتمشة قبل ما نعس..... كنت تانستغفر حيت غلطت و مشيت عند الدجالة و هادا راه شرررك و من الكبائر كنت محتاجة نغسل نفسي شويا من الدنوب و من بعد كنت تاندعي و عندي يقييين بالاجابة و ما تخفاش عليكم الاية العظييييمة فقلت استغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا ..."
يعني لي بغى الرزق و المال و البنون و الزوج و الجنة. و المغفرة و الراحة النفسية .. ماعليه هير يستغفر و ان شاء الله ربي مايخيب تاحد.
و الوصفة التانية هي الصدقة و الصدقة ماشي بالضروري تكون فلوس حيت انا شخصيا كانت واحد الايام دايزا فيا الصدقة .... ولكن كانو عندي حوايج صبابط صيكان ماكلة.... صدقت حوايجي صدقت السجادة ديالى حطيت قران فمسجد يقراو فيه الناس الا الحاجة عندي منها جوج تانعطي حاجة و نخلي حاجة نلبس صباط و نعطي صباط خليت.... حتى من البيجامات ديالي كولشي صبنتو و عطيتو والله القسم حتى من الريحة صدقتها كنت تانعطي حوايجي و تانقول ربيغادي يغنيني و يعوضني ان شاء الله و الا ماعوضنيش ان شاء الله تكون فميزان حسناتي و كنت الا عندي درهم تانلقا شي دىي فالزنقة تانعطيها ليه واخة هيييير درهم راه غادي تفرحو.... الا كانت شي جنازة و كانت عندي هير 20 درهم تانشري 20 خبزة و ندخل نحطها و نخرج و لي طيبناها فالدار تانخلي شوية لجارتنا حيت حتى هادي محسوبة صدقة باذن الله 

عَنْ أَبِي هُرَيْرَةَ رَضِي اللَّه عَنْه ، عَنِ النَّبِيِّ صَلَّى اللَّه عَلَيْهِ وَسَلَّمَ قَالَ : " يَا نِسَاءَ الْمُسْلِمَاتِ ، لَا تَحْقِرَنَّ جَارَةٌ لِجَارَتِهَا ، وَلَوْ فِرْسِنَ شَاةٍ" 

سمحولي طولت عليكم... المهم دازت الايام و انا على هاد الحال حتى عيطلي راجل صاحبتي لواحد الخدمة لي كادفعت ليها ما وجدت ليها هادشي كان لعام لي فات ليلة العيد الكبير مشيت دوزت مقابلة و شدوني ديك الساعة نخدم الحمد لله خدمت و شديت مكتب ديالي و درت بلاصتي و كولشي كان تايحتارمني و تايقدروني و بقيت على نفس الحال الاستغفار و الصدقة... اه نسيت قبل مانخدم كنت تاندعي ديييمة يا ربي تعطيني منين نعطي ديييمة نفس الدعاء و الدعاء ديالي المشهور ياااربي تعلي مقامي هههه واخة كنت خدامة منت مازالة تاندعي و عندي طموح اكتر و فعلا بعد 4 اشهر بدلت الخدمة بما احسن كنت خلامة فمدرة عليا للمعلوميات و من بعد خدمت فالمجال ديالي... الحمد لله خدمت واخة باجماع الدجالة كولهوم قالولي ماتخدميش.... ولكن ربي هو الرزاق ماشي هوما و بعد 4 اشهر اخرى تزوجت احسن زوج  اللهم تعالى يقدرني نخدمو حياتي كاملة هو العائلة ديالو الاكثر من رائعة و درت احسن عرس لي كان بسيييط جدا و بلا هندقة لا والو و عاودت عرس واحد اخر فتركيا عرس اسلامي مبارك الحمد لله لان ربي حقق لي دعوتي و تزوجت تركي المهم ماشي مغريبي حيت كرهت جنسهوم و منت باغة نخوي البلاد  و سكنت ف احسن دولة لي كنت هير تانحلم بيها و كنت تانشوف لباس المحتجبات ديالهوم فالنت و تانقول اللله شحال زووين....
المهم العبرة من هادشي كاامل عااافاكوم ماتيقوش الهضرة ديال الشوافة و الفقهة و ماتضيعوش فلوسكوم عليهوم واخة حتى 20 درهم خسارة فيهوم و لي ابتلاها الله بالمس او السحر او العين عليكوم هير بالقران راه والله العضيم القران كافي شافي خاصنا هير نديرو النية و اليقين و نقولو القران هو لي يشفيني.... شحال من مرة قريت هنايا شي وحدة كاتقول ديري النية و تيقي فهاد الوصفة باش تصدق ليك اوا لاش لا مانتيقوش في القران....
و حاجة اخرى مهمة تانلاحضها اختي لحبيبة راه الا صاحبك ولا راجلك مسخوط الواليدين ولد الحرام شماتة ماتايحتارمكش تايفسد عليك تايكدب عليك.... راه والله السحر ما يبدل طبعو راه لي مزيان راه مزيان... الا شد ليك السحر غادي يجي لوقت لي يتبطل وانتي اكيد اختي ماناوياش تضيعي شبابك فالسحور و تسولي هاد الشوافة و تكتبي عند هاد الفقيه و تبخري و تحرزي.... الحياة احسن من هاكدا !  انا كنت غادة نتزوج باحد السيد و منين ما بانليش ولد الناس و عينو زايغة و مدوز عاع الحرام لي كاين فهاد الدنيا...ما ضيعت عليه فلوس عند شوافات ما شريت عليه قوام... درت الوصفة ديال الموس و نسيتو وتهنيت و ربي عوضني بزوج على د نيتي و على قد داكشي لي كنت تاندعي ربي... الحمد لله... اما السحر راه تايرجع على الساحر راه مدكورة فالقران انقلب السحر على الساحر...
و اخيرا الوصفة ديال الاستغفار ماشي انا الاولى لي جربتها و نجحاتلي.... هادي احسن و اسهل و ارخص وصفة نصحكوم تجربوها و ان شاء الله ربي يفرجها على كل واحد و يفرح كل مضيوم و يرزق كل محتاج و الله يعلي مقامكوم كااااملين ان شاء الله.